سی پیک دے تحت پاکستان اچ باری سرمایہ کاری دے نتیجے اچ نویں صنعت قائم کیتیاں ویندیاں پن ،سی پیک دے ذریعے گوادر دی بندرگاہ تئیں بئے ملکاں کوں سوکھی رسائی حاصل تھیسی ،پاکستان تے چین افغانستان اچ امن دی صورت حال دی چنگائی دے حوالے نال ہک نظریہ رکھیندے ہن ،بھارت مقبوضہ کشمیر اچ جاری ظلم توں بین الاقوامی توجہ ہٹاونڑ سانگے پاکستان تے الزام لیندا ہے
اسلام آباد ۔ 28 ستمبر (اے پی پی) وزیر خارجہ خواجہ محمد آصف آکھیا ہے جو چین پاکستان اقتصادی راہداری منصوبہ نہ صرف پاکستان سانگے ہک گیم چینجر منصوبہ ثابت تھیسی بلکہ ایندے نال پورے خطے اچ اقتصادی رابطے دا ہک نواں دور شروع تھیسی ،خطے دے مختلف ملکاں دے ڈو پاسے رابطے دے ودھارے دے نال سی پیک سیاسی جھیڑے کوں گھٹ کرنڑ اچ معاون ثابت تھیسی ۔خمیس کوں چائنا گلوبل ٹیلی ویژن نیٹ ورک (سی جی ٹی این) دے پروگرام اچ گالھ مہاڑ کریندے ہوئیں وزیر خارجہ آکھیا جو ایں ویلھے خطے دے ملکاں دی سانجھی تجارت بہوں گھت ہے لیکن سی پیک تے ہک سڑک ہک خطے دے اقدام دے پورا تھیونڑ نال خطے دے سارے ملکاں دے تجارتی رابطے اچ ودھارے تے اقتصادی خوشحالی دے نویں دور دا آغاز تھیسی ۔انہاں آکھیا جو مختلف ملکاں دے معاشی رابطے دے سیاسی اثرات مرتب تھیسن جیں نال سیاسی جھیڑے کوں مکاونڑ اچ مدد مل ویسی ۔ خواجہ محمد آصف آکھیا جوتجارت ، سیاحت اتے عوام دے عوام نال رابطے دے ذریعے خطے دے ملکاں دے سانجھے تعلقات تے خوشگوار اثرات مرتب تھیسن ۔وزیر خارجہ آکھیا جو سی پیک دے تحت پاکستان اچ باری سرمایہ کاری دے نیتجے اچ نویاں صنعتاں قائم کیتیاں ویندیاں پیاں ہن تے سی پیک دے ذریعے گوادر دی بندر گاہ تئیں بئے ملکاں کوں سوکھی رسائی مل ویسی ۔ہک سوال دے جواب اچ انہاں وضاحت کیتی جو سی پیک دے تحت کیتی ونجنڑ آلی س رمایہ کاری قرضے کائنی تاں جو اے انتظام آمدنی حاصل کرنڑ سانگے کیتے ویندے پے ہن ۔انہاں آکھیا جو اساڈی معیشت اچ تکھا ودھارا تھیندا پیا ہے تے باہرلیاں ادائیگیاں سانگے ملک ڈے زر مبادلہ موجود ہے ۔چین دے وزیر خارجہ وانگ ژی نال اجوکی ملاقات دے حوالے نال سوال تے انہاں آکھیا جو ڈوہیں ملکاں دی سوچ اچ مماثلت ہے ۔انہاں آکھیا جو اساں توقع کریندوں جو دسمبر اچ چین اچ پاکستان ،چین تے افغانستان دے وزیر خارجہ دی ملاقات تھیسی تے اساں افغان مسئلے دے سیاسی حل سانگے بئے پلیٹ فارم وی استعمال کرنڑ دی امید رکھیندوں ۔انہاں آکھیا جو پاکستان تے چین افغانستان اچ امن وامان دی صورت حال دی چنگائی دے حوالے نال ہکو جیہا نظریہ رکھیندے ہن تے سمجھدے ہن جو کئی سالاں توں جاری افغان جھیڑے دے سیاسی پر امن حل خطے دے ملکاں دے مفاد اچ ہے ۔ہک سوال دے جواب اچ انہاں آکھیا جو افغان جھیڑے دے خاتمے دے حوالے نال امریکہ سمیت بئے کئی پلیٹ فارم موجود ہن تے افغانستان دے مسئلے دے حل سانگے امریکہ ہک اہم شراکت دار ہے ۔خواجہ آصف آکھیا جو وزیر اعظم اقوام متحدہ دی جنرل اسمبلی دے اجلاس دے موقع تے امریکی صدراتے نائب صدر نال ملاقاتاں کیتیاں جیرھیا جو موثر رہیاں تے دہشت گرداں دیاں محفوظ پناہ گاہیں بارے انہاں آکھیا جو افغانستان دا 40فیصد علاقہ افغان طالبان دے کنڑول اچ ہے جیں دی وجہ توں انہاں کوں پاکستان دی سرزمین دی ضرورت کائنی تے پاکستان اچ طالبان دیاں محفوظ پناہ گاہیں دا سوال غیر ضروری ہے ۔ہک سوال دے جواب اچ انہاں آکھیا جو لاجسٹک سپورٹ دے حوالے نال امریکہ پاکستان کوں ادائیگی کریندا ہے ۔انہاں آکھیا جو کشمیر اچ کئی سالاں توں نینگراں کوں شہید کرنڑ داے علاوہ انہاں تے ریاستی تشدد دے ذریعے انہاں کوں معذور بنڑایا ویندا پیا ہے جڈاں جو گزریل 14مہینے دی صورت حال مقبوضہ کشمیر دے لوکاں سانگے بہوں خوفناک رہی ہے ۔انہاں آکھیا جو کشمیر اچ جاری بھارتی ظلم کوں میڈیا نشابر کیتا جڈاں جو ایں حوالے نال انسانی حقو ق دیاں کئی بین الاقوامی تنظیماں وی کم کریندیاں پیاں ہن ۔انہاں آکھیا جو بھارت اچ 66دہشت گرد تنظیماں کم کریندیاں پیاں ہن جڈاں جو علیحدگی دیاں کئی تحریکاں وی جاری ہن ۔بھارت بین الاقوامی برادری دی توجہ ہٹاونڑ سانگے پاکستان تے الزام لیندا ہے تاں جو مقبوضہ کشمیر اچ جاری ظلم توں عالمی برادری دی توجہ ہٹائی ونج سگے ۔ چینی صدر ژی جن پنگ دے پاک چین تعلقات اچ ودھارے دے حوالے نال کردار بارے اچ انہاں آکھیا جو پاکستان اتے چین دے ڈو پاسے تعلقات نویاں اچایاں تے ویندے پن تے چین دے صدر ڈوہیں ملکاں دے سانجھے تعلقات کوں نویں جہت ڈتی ۔انہاں آکھیا جو پاکستان تے چین دے دوستانہ تعلقات تاریخی تے بہوں قابل اعتماد ہن ۔
