اسلام آباد۔6جنوری(اے پی پی)ملک دے مغربی اتے اتلے حصیں اچ مینھ تے پہاڑاں تے برف پووݨ دا سلسلہ شروع تھیوݨ دا امکان اے ، مغربی ہوائیں دے زیر اثر علاقیں اچ پالے دی شدت اچ ودھارے دے نال نال برف باری پاروں رستے متاثر تھیوݨ توں علاوہ لینڈ سلائیڈنگ دا ݙر وی ظاہر کیتا ڳئے، سارے متعلقہ اداریں کوں مشورہ ݙتا ڳئے جو کہیں وی ممکنہ ناخوشگوار صورتحال نال نبݨݨ کیتے تیار ہن ۔ محکمہ موسمیات موجب مغربی ہوائیں 6 جنوری (شام/رات) توں شمالی بلوچستان اچ داخل تھیوݨ دا امکان اے تے ہفتے دے چھیکڑ اچ اتلے علاقیں کوں آپݨی وٹھ اچ گھنسی ، ایں موسمی نظام دے زیر اثر 07 اتے 08 جنوری کوں کوئٹہ، ژوب، بارکھان، زیارت، نوکنڈی، دالبندین، ہرنائی، قلعہ سیف اللہ، قلعہ عبداللہ، چمن تے پشین اچ ہلکا مینھ تے پہاڑاں تے برفباری متوقع اے۔ مری، گلیات، کشمیر (وادی نیلم، مظفرآباد، پونچھ، ہٹیاں، باغ، حویلی، سدھنوتی، کوٹلی، بھمبر، میر پور)، گلگت بلتستان (دیامیر، استور، غذر)، سکردو، ہنزہ، گلگت، گھانچے، شگر)، چترال، دیر، سوات، مالاکنڈ، کوہستان، مانسہرہ اتے ایبٹ آباد اچ 7 توں 9جنوری تئیں ہلکا مینھ تے پہاڑاں تے برفباری متوقع اے۔ ایویں ویک اینڈ دے دوران اسلام آباد، پوٹھوہار ریجن، چارسدہ، باجوڑ، کرم، وزیرستان اتے کوہاٹ اچ وی ہلکا مینھ وسݨ دا امکان اے ۔ مینھ کھڑیاں فصلاں کیتے خاص طور تے بارانی علاقیں اچ فیدہ مند ثابت تھیسی ۔ پیشن گوئی دی مدت دے دوران کوہیڑ گھٹݨ دا امکان اے ۔ایں دوران ݙینھ دا درجہ حرارت (05-07) °C ڈھݨ دا امکان اے ۔ پہاڑی علاقیں اچ برف باری پاروں گاݙیاں دی آمدورفت اچ مسئلہ تھی سڳدے ، ایں توں انڄ کشمیرتے گلگت بلتستان اچ لینڈ سلائیڈنگ دے امکان کوں رد نی کیتا ونڄ سڳدا جیں دی وجہ توں متاثرہ جہیں تے سڑکاں بند تھی سڳدن ، ایں صورت حال اچ سارے متعلقہ اداریں کوں مشورہ ݙتا ویندے جو او پیشن گوئی دی مدت دے دوران کہیں وی ناخوشگوار صورتحال نال نبݨݨ کیتے تیار رہن۔
.jpg)
